Wilaya ya Mkalama kuadhimisha kilele cha kichaa cha Mbwa.

Imewekwa kwenye: September 30th, 2022

Katika kuadhimisha Kilele cha Kichaa cha Mbwa Duniani (World Robbies Day) Wizara ya Mifugo na uvuvi  kushirikiana na Taasisi isiyo ya Kiserikali Education for African  Animals  Walfare(EAAW)    imetoa  chanjo ya Mbwa  wapatao 432 wilayani Mkalama.

Chanjo hiyo imetolewa  katika  Vijiji vya Yulansoni , Msingi pamoja na  Maziliga  wilayani Mkalama Mkoa wa Singida.

Akiongea katika zoezi  hilo Afisa  Mifugo wilaya ya Mkalama Elias Mbwambo amesema kuwa  zoezi hili ni kutekeleza takwa la Kisheria  chini ya sheria  Na. 17 ya mwaka 2003 ya udhibiti wa magonjwa ya  wanyama na sheria  Na.19 ya 2008 ya haki na ustawi wa Wanyama rafiki.

Aidha Mbwambo aliongeza kwa kuwataka wananchi kuzingatia zoezi hili adhimu pindi linapokuja kwao  kwani  chanjo  inatolewa  bure na itawakinga wanyama  na ugonjwa wa kichaa cha Mbwa unaopelekea kupoteza wanyama na kutumia gharama nyingi pindi Mbwa wanapong’ata watu kutokana na matibabu kuwa ghali.

Mkurugenzi wa shirika la  Education for African Animals Walfare Ayubu  Nnko amesema   toka mwaka 2019 wamekuwa wakishirikiana na Wilaya ya Mkalama katika kutokomeza ugonjwa wa kichaa cha Mbwa  ambao awali ulikuwatishio kubwa ukilinganisha na sasa .

Aidha alitumia fursa hiyo kuwataka wadau wa maendeleo  wilayani  Mkalama kushirikiana na Idara ya mifugo na uvuvi kujitokeza  kuwekeza kwenye Wanyama kwani nao wanahaki ya kuishi na kuhudumiwa kama vile kupatiwa chanjo na mahali salama pa kuishi.

Baadhi ya wafugaji wameishukuru serikali kupitia Wizara ya Mifugo na Uvuvi kutoa dozi 500 za chanjo ya Mbwa na kuongeza kuwa chanjo hiyo itawasidia wanyama wao kuwa salama kwani wanawasaidia katika ulinzi pindi wanyama waharibifu  na  wezi wanapoenda kuiba.

’’Mbwa ni  wanyama rafiki  maana wanatusaidia kwenye ulinzi  tunaishukuru serikali kuona umuhimu wa wanyama wetu na kutuletea chanjo ya kutibu kichaa cha Mbwa , nashauri watu wengine ambao hawajawaleta  Mbwa  walete wapatiwe chanjo’’ alisema Isron Japhet

Kilele cha Kichaa cha Mbwa huadhimishwa kiala ifikapo Septemba 28 kila mwaka.