UZENI SUKARI KWA BEI ELEKEZI YA SERIKALI 'MOSES MACHALI'

Imewekwa kwenye: January 25th, 2024

Mkuu wa wilaya ya Mkalama Mhe Moses Machali amewataka wafanyabiashara wilayani Mkalama mkoani Singida kuuza sukari kulingana na bei elekezi ya serikali na kuwataka wasifiche sukari kwani atayebainika kufanya hivyo atachekuliwa hatua kali za kisheria

Kauli hiyo ameitoa  Januari 24,2024 mara baada ya kumaliza zoezi maalum la kukagua na kuwabaini wafanyabiashara wanaouza sukari bei juu tofauti na maelekezo yaliyotolewa na serikali kupitia bodi ya taifa ya sukari nchini.

"Bei  ya rejareja  ya sukari katika mkoa wa Singida kwa mujibu wa Bodi ya Sukari nchini haipaswi kuzidi shilingi 3000.Tutakayemkuta anauza sukari zaidi ya shilingi 3000 tutamkamata. Mnasababisha maisha ya wananchi yanakuwa magumu. Hatuwezi kuruhusu hilo" Mhe. Moses Machali

"Wafanyabiashara wa Mkalama msiuze sukari kwa bei rejareja zaidi ya shilingi 3000, na wananchi wa Mkalama mkisikia popote mfanyabiasnara anauza sukari kwa bei ya rejareja zaidi ya shilingi 3000 toa taarifa tumshughulikie. Pia wafanyabiashara wa Mkalama msifiche sukari, ukabainika tutakukamata kwa kosa la uhujumu uchumi. Tutakushughulilia" Mhe. Moses Machali

Aidha Mkuu wa wilaya ya Mkalama Mhe. Moses Machali amewakumbusha  wafanyabiashara hao kuhakikisha wanakuwa na stakabadhi za malipo pindi wanaponunua sukari kutoka kwa wasambazaji wakubwa ili kuweza kubaini kwanini wanauza bei kubwa tofauti na maelekezo ya yaliyotolewa na serikali kupitia Bodi ya sukari nchini.