RC SINGIDA AIPONGEZA WILAYA YA MKALAMA KUJIBU HOJA ZA MKAGUZI MKUU WA HESABU ZA SERIKALI

Imewekwa kwenye: June 15th, 2022

Mkuu wa Mkoa wa Singida Dkt. Binilith Mahenge ameipongeza menejimenti ya halmashauri ya Wilaya ya Mkalama kwa namna walivyojibu hoja za mkaguzi  Mkuu na mdhibiti wa hesabu za serikali jambo alilotaja kuwa ni ushirikiano Mkubwa kwaajili ya masilahi ya wilaya na Mkoa kwa ujumla.

 Rc. Mahenge alisema hayo mapema leo katika kikao cha Baraza la madiwani la hoja lilifanyika katika ukumbi wa sheketela uliopo  halmashauri ya wilaya ya Mkalama.

‘’Halmashauri ya wilaya ya Mkalama sina maneno mengi   kwa sababu mnafanya kazi nzuri na moja ya kipimo cha kazi nzuri iko kwenye ukusanyaji wa  mapato, na  mwezi wa tatu kulifanyika tathimini ya mapato  kati  ya halmashauri zilizofanya vizuri Mkalama nayo ilikuwepo  hii inadhihirisha  kuwa mnafanya kazi kwa kushirikiana na hadi sasa mna asilimia 95% ya ukusanyaji wa mapato  niwapongeze sana kwa  kazi nzuri mnayoifanya’’ Aliongeza Rc Mahenge.

Hata hivyo aliagiza watumishi wote wa halmashauri kuwa na taarifa ya fedha zote zilizotumika kwenye miradi na kuzisambaza kwa madiwani ili wajue fedha zilizotumika katika kata zao  na kurahisisha ufuatiliaji kwa kila hatua.

Pamoja na hayo aliendelea kupinga vikali suala la Wanganga wa jadi wanaotumia ramli chonganishi  ( LAMBALAMBA)  wilayani  hapa  kuwa vitendo hivyo ni  kinyume na  sheria za Nchi kwani wanapita kwa wananchi na kuwachangisha fedha  ili kuwatibu suala hilo halikubaliwi kwani linavunja amani  na kuchochea chuki kwa wananchi.

Hata hivyo aliwaagiza madiwani kusimamia suala hilo kwenye Kata zao huku akitoa onyo kali kwa yeyote atakayekiuka agizo hilo hatua kali za kisheria zitachukuliwa dhidi yake.

Mkuu wa Wilaya ya Mkalama Sophia Kizigo alitumia fursa hiyo kuwataka madiwani pamoja na viongozi mbalimbali wilayani Mkalama kuwasisitiza wananchi kutunza  akiba ya  chakula walichonacho  ili wilaya isije ikakubwa na njaa kutoka na mvua kunyesha chini ya wastani hivyo kupelekea  baadhi ya maeneo kuwa na uhaba wa chakula.

Awali akisoma taarifa Mkurugenzi  Mtendaji wa Halmashauri ya Wilaya ya Mkalama Asia Messos alisema kati yahoja 51 zilizoibuliwa na Mkaguzi mkuu wa serikali  tayari  27 zimejibiwa kikamilifu huku zingine 24 zikiwa hazijabiwa kikamilifu na kuongeza  kuwa Menejimenti ya wilaya ya Mkalama imejipanga kikamilifu kujibu hoja hizo huku wakihakikisha wanaziba mianya ya kuibuliwa kwa hoja mpya.

Diwani wa kata ya Mwangeza Bosco Samwel ambaye pia ni Makamu Mwenyekiti wa  Halmashauri ya Wilaya ya Mkalama alisema kuwa uongozi wa wilaya ya Mkalama kwa kushirikiana na wataalamu mbalimbali wilayani hapa watahakikisha wanafanya kazi kwa kushirikiana ili kuongeza ukusanyaji wa mapato  na kuendelea kupata hati safi.