RC SERUKAMBA AWATAKA WAKUU WA WILAYA KWENDA KUTATUA CHANGAMOTO ZA WANANCHI

Imewekwa kwenye: February 7th, 2023

MKUU wa Mkoa wa Singida, Peter Serukamba, amewagiza Wakuu wa Wilaya  wapya waliotambulishwa mkoani hapa  kwenda kutatua matatizo na changamoto zinazowakabili wananchi katika maeneo yao ikiwamo migogoro ya ardhi pamoja na kuhakikisha wanaongeza ukusanyaji wa mapato ya serikali.

Ametoa agizo hilo leo (Februari 7, 2023) wakati akiwatambulisha wakuu wa wilaya wanne waliohamishiwa mkoani hapa ambao ni Mkuu wa Wilaya ya Ikungi, Thomas Apson, Mkuu wa Wilaya  ya Iramba, Joshua Nassari, Mkuu wa Wilaya ya Mkalama, Moses Machali na Mkuu wa Wilaya  Manyoni, Kemilembe Lwota.

Aidha amesema mkoa  una migogoro mingi ya ardhi  hivyo namna pekee ya kutatua changamoto hiyo ni kuimarisha ushirikiano baina ya viongozi na wananchi na kudhibiti vitendo vya rushwa ili  kuwapatia haki kwa kila anaye stahili.

Pamoja na hayo Serukamba amewataka wakuu hao wa wilaya kusimamia suala la mapato kwa kuwa bado inaonekana uwepo wa  mianya  ya ubadhirifu wa fedha za serikali,  ambapo ameelekeza kufanya uchunguzi kwenye minada na leseni za biashara kwani huko ndiko kwenye upotevu mkubwa wa fedha.