Mkalama bila UKIMWI inawezekana

Imewekwa kwenye: December 2nd, 2021

Katika kupambana na ugonjwa wa UKIMWI ni muhimu kila mtu kuzingatia  kwa dhati elimu na ushauri wanaopata kutoka kwa wataalamu ,Viongozi wa serikali na viongozi  wa dini wa kujiepusha na mambo mbalimbali yanayowaingiza katika ushawishi na kuwapelekea kufanya maamuzi yasiyosahihi yanayowapelekea kwenye hatari ya kupata Maabukizi ya UKIMWI.

Hayo yamesema katika maadhimisho ya siku ya  UKIMWI Duniani ambayo hufanyika Disemba Mosi ya kila mwaka na ambapo kiwilaya ilifanyika katika Kijiji cha Ishinsi Kata ya Msingi.

Akimuwakilisha Mkuu wa wilaya ya Mkalama, Afisa Tarafa wa Tarafa ya Nduguti  Bw. Remigius Ngole  amesema kuwa katika kupambana na janga la Ukimwi jamii inatakiwa kujiepusha na vitendo  vinavyochochea kujamiana ikiwa ni pamoja na ulevi uliopitiliza  pamoja na utumiaji  wa madawa ya kulevya .

‘’UKIMWI upo Duniani kote na maambukizi yapo Zaidi kusini mwa Jangwa la Sahara  na Tanzania ni moja ya nchi  zilizopo eneo hilo .Mkalama sio Kisiwa hivyo mfahamu kwamba UKIMWI upo wilaya ya Mkalama , na hali ya maambukizi ya UKIMWI  Kiwilaya kwa kipindi cha January hadi Oktoba ni 2.1% hivyo nawasihi tuendelee kuchukua hatua Madhubuti ya kupambana na ugonjwa wa UKIMWI’’.aliongeza Bw.Ngole.

Awali akisoma risala kwa Mgeni Rasmi Mratibu wa Ukimwi  Halmashauri ya wilaya ya Mkalama Bw. Zakaria Lupindo amesema kuwa  kuna umuhimu mkubwa wa jamii kuendelea kuelimishwa ili kufahamu umuhimu wa kupima  afya zao  ili wanaogundulika kuwa na maambukizi  ya VVU kuanza kutumia dawa za kufubaza makali ya VVU.

Katika hatua nyingine Bw.Lupindo ameishukuru serikali kuongeza vituo vya Tiba na Mafunzo (CTC) kutoka vituo 5 vivyokuwepo mwanzo hadi 10 kwani imesaidia kusogeza huduma  ya tiba na  matunzo kwa wanaoishi na VVU  ndani ya wilaya ya Mkalama  ambapo kwa vituo vyote 10 upatikanaji wa dawa ni 100%  ambayo imepunguza usumbufu wa kufuata dawa Nje ya wilaya.

Pia amesema kuwa timu ya uendeshaji afya wilaya hasa waratibu wa UKIMWI  wamefanya juhudi za kuhamasisha na kutoa elimu na kuweza  kupima  wananchi afya zao ambapo kwa kipindi cha January hadi Oktoba jumla ya watu 16,092 ambapo wanaume walikuwa ni 6,324 na wanawake ni 9,770 walipima  afya zao na kutambua afya ,walikutwa na  na maambukizi ya VVU ni 343 wanaume 136 na wanawake 207 sawa na asilimia 2.1 ya Maambukizi  huku walionza huduma ya tiba na mafunzo wakiwa ni 342.

Kila ifikapo tar 1/12ya kila mwaka Tanzania huungana na mataifa yote Duniani kufanya maadhimisho ya siku ya UKIMWI ikiwa na lengo la kutoa elimu ya kujikinga na VVU pamoja na kutathimini hali ya maambukizi ya virusi  vya UKIMWI  na kupata mapendekezo ya njia bora za kufanya ili kudhibiti maambukizi mapya VVU.

Kauli mbiu ya mwaka  huu ni ‘’ZINGATIA USAWA ,TOKOMEZA UKIMWI ,TOKOMEZA MAGONJWA YA MLIPUKO.’’ikiwa na lengo la kuhimiza usawa  katika jitihada zote zinazochukuliwa katika  mapambano dhidi ya UKIMWI  na magonjwa mengine ya  mlipuko ikiwemo ugonjwa wa homa kali ya mapafu yaani UVIKO 19.