Mbunge viti maalumu agawa kg 550 za Mbegu ya Alizeti ili kuunga Mkono juhudi za Serikali .

Imewekwa kwenye: November 18th, 2021

Mbunge wa viti maalum Mkoa wa Singida Mhe.Aysharose Mattembe amegawa  kilogramu Mia tano hamsini  za mbegu ya  Alizeti (Kg550) aina ya Record (Standard) kwa  Wanawake wa wilaya ya Mkalama  ili kuunga mkono juhudi za Serikali ya kuongeza tija katika uzalishaji wa zao la Alizeti Mkoani Singida.

Zoezi hilo lilifanyika  hivi karibuni katika ukumbi wa Ofisi za Chama cha mapinduzi (CCM) Kijiji cha Nduguti kata ya Nduguti wilayani Mkalama katika ziara yake ya Kikazi ya kutembelea  Wanawake  wa  Mkoa wa Singida .

Aidha Mhe.Matembe alisema kuwa serikali imekua ikitumia Fedha nyingi kuagiza mafuta ya kula nje ya Nchi  ndio maana ikaja na mkakati wa kuongeza tija katika uzalishaji wa zao hilo kwa Mikoa ya Dodoma, Simiyu  na Singida ya kuhakikisha zao la alizeti linalimwa kwa wingi ili mafuta yapatikane kwa wingi Nchini.

Pia amewataka wanawake kufanya kazi kwa bidii na kuongeza uzalishaji kwa maslahi mapana ya familia, wilaya na Taifa kwa ujumla.

“Naipongeza serikali yetu kuona ipo tija ya kuongeza uzalishaji wa  zao la Alizeti nimeona nami niiunge mkono serikali yangu sikivu  kwa kugawa mbegu hizi kwa wanawake hawa ninajua wanawake ndio wazalishaji wakuu hivyo ninawaombea mbegu hizi zikamee na kazaa vizuri ili kuongeza pato lenu wanawake na familia zenu kwaujumla’’. Aliongeza Mhe.Mattembe.

Awali akitoa elimu ya kilimo cha zao la hilo , Afisa kilimo wilaya ya Mkalama Bw.Daniel Jacobo  alisisitiza kanuni bora za kilimo cha alizeti , ambazo ni  kupanda kwa wakati, kutumia   mbolea za Asili na za Viwandani kupalilia kwa wakati huku wakiwataka  kuwatumia wataalamu pindi wanapoona mimea yao haipo kwenye hali ya kawaida.

Akitoa neno la shukurani kwaniaba ya wanawake hao Diwani wa viti maalumu  wilaya ya Mkalama Mhe.Mariam Kahola alimshukuru Mhe.Mbunge kwa kuwatembelea wanawake wa wilaya ya Mkalama na kuwapatia mbegu  za alizeti ili kuongeza uzalishaji wilayani Mkalama ambapo aliongeza kuwa watatumia elimu ya kilimo   vizuri kwa kulima zao la  alizeti  na kuzingatia  kanuni bora za kilimo  katika kukuza pato la wilaya na taifa kwa ujumla.