"MARUFUKU DENGU KUNUNULIWA SHAMBANI" DC MACHALI

Imewekwa kwenye: August 14th, 2024

Mkuu wa Wilaya ya Mkalama Mhe. Moses Machali amepiga marufuku kwa wafanyabiashara pamoja na wakulima wilayani Mkalama  kuuza na kununua  zao la Dengu  nje ya mfumo wa Stakabadhi Ghalani.

Marufuku hiyo ameitoa Agosti 13,2024 wakati wa mnada wa kwanza wa Dengu uliofanyika katika ghala la mazao lililopo Nduguti kwa njia ya mfumo wa TMX ambao umeshuhudia bei kwa kilo ikiuzwa kwa shilingi 2003.282

“Lengo la serikali ni kumnyanyua Mkulima, tunaka Mkulima auze Dengu yake hapa, hivyo kuanzia leo napiga marufuku kwa mtu yeyote kununua na kuuza Dengu shambani, atakayebainika atachukuliwa hatua kali za kinidhamu” Mhe. Machali

Mhe. Moses Machali pia amepiga marufuku kwa wafanyabiashara kusafirisha zao la Dengu nyakati za usiku bila ya kibali kinachoonesha Dengu hiyo imenunuliwa katika Ghala  “kuanzia leo marufuku kusafirisha Dengu wakati wa usiku Kwenda wilaya nyingine ikiwa hauna kibali maalumu, natoa siku saba kwa wafanyabiashara ambao walikuwa tayari wamenunua Dengu walete hapa Ghalani.” Mhe. Machali

Aidha Mhe. Moses Machali amewataka wakulima wilayani Mkalama kuzingatia kanuni za kilimo bora kwa kutumia mbolea kwa wingi ili waweze kupata mazao mengi na kupelekea kukuza Uchumi wao.“Serikali ya awamu ya sita imedhamiria kunyanyua sekta ya kilimo nchini, nawasihi wakulima nendeni mkajindikishe, serikali ipo kwa ajili yako Mkulima, tumieni fursa hii vizuri” Mhe. Machali