MADIWANI WATAKIWA KUHAMASISHA KILIMO NA UFUGAJI WA KISASA

Imewekwa kwenye: December 2nd, 2025

Mwenyekiti wa Halmashauri ya Wilaya ya Mkalama, Mhe. Mohamed Hamis, amewataka Madiwani wa wilaya hiyo kuwa mstari wa mbele katika kuhamasisha wananchi kulima kwa wingi kwa kuzingatia kilimo cha kisasa ili waweze kukuza vipato vyao.

Wito huo ameutoa Desemba 2, 2025, wakati wa Kikao cha Kwanza cha Baraza la Madiwani kilichofanyika katika Ukumbi wa Sheketela uliopo Halmashauri ya Wilaya ya Mkalama.

“Tumefika kwenye kilimo, tuhamasishe watu walime. Wilaya yetu tuna shughuli mbili: kilimo na ufugaji. Tukihamasisha watu walime, wakilima wataondokana na umasikini,” alisema Mhe. Mohamed.

Aidha, Mhe. Hamis alisisitiza umuhimu wa wakulima kujiunga katika vyama vya ushirika ili waongeze tija na kupata faida zaidi kupitia kilimo.
“Ushirika ni jambo muhimu sana, tuhamasishe wakulima wajiunge katika vyama vya ushirika,” aliongeza.

Akizungumzia sekta ya ufugaji, Mhe. Mohamed aliwataka madiwani kuendelea kuwaelimisha wananchi kuhusu ufugaji wa kisasa ili kuongeza tija na ubora wa mifugo yao.