Zoezi la kuvisha Hereni za Kielectronic Mifugo linaendelea wilayani Mkalama

Imewekwa kwenye: October 30th, 2022

Takribani  Mifugo 271,968  inatarajiwa kuvishwa hereni Wilayani Mkalama ili kutekeleza takwa la kisheria la utambuzi  ,usajili na ufuatiliaji wa mifugo ya mwaka 2010 na kanuni zake za mwaka 2011 ili kuongeza uzalishaji wenye tija kwa mifugo na mazao yake.

 Afisa Mifugo wilaya ya Mkalama  Bw. Elias Mbwambo amesema kuwa zoezi hilo linaendelea  katika kata ya Iguguno kwa Vijiji vya Iguguno na Senene na lilianza tar 19/10 /2022 hadi sasa  takribani Ng’ombe 2,458 , Mbuzi 373 ,Kondoo 172 na Punda 49 wamekwisha tambuliwakwa kuvishwa hereni za Kielektroniki.

Aidha Bw. Mbwambo   aliongeza  kuwa utambuzi huu ni nyenzo muhimu katika uzalishaji wenye tija  na faida kwa mifugo na mazao yake  katika masoko ya ndani na nje ya Nchi ukilinganishwa na hapo awali ambapo mifugo ilikuwa inapigwa chapa kupata changamoto nyingi ikiwa ni pamoja na mifugo iliyowekewa alama kufutika  pia  alama hizo  kuharibu ubora wa ngozi kwakuwa na vidonda hivyo kukosa soko.

Hivyo alitumia fursa hiyo kuwataka wananchi na wafugaji wote kupeleka mifugo ya kwaajili ya kutekeleza takwa hilo la kisheria  kwani watapata faida nyingi ikiwa ni pamoja na kudhibiti wizi wa mifugo, kuuuza mifugo yao ndani na nje na Nchi pia itasaidia wao kupata mikopo na kuweza kufanya shughuli mbalimbali husuasani za kuongeza kipato chao.