ZAO LA PAMBA KULIMWA KIMKAKATI WILAYANI MKALAMA.

Imewekwa kwenye: October 3rd, 2022

Zao la pamba limetaja kuwa zao la Kimkakati  na likilimwa kwa kufuata sheria na taratibu linaweza kuongeza pato la Taifa, Mkoa , Wilaya na kwa Mtu mmoja mmoja.

Balozi wa zao la pamba Kitaifa  Agrey  Mwanry amesema hayo  Oktoba  2  wakati  wa ufunguzi wa kampeni  ya kuhamasisha  kilimo cha zao la pamba katika wilaya ya Mkalama.

Katika ufunguzi wa kampeni hiyo alianza kufanya kikao cha ndani na  wataalamu wa kilimo pamoja na wakuu wa Idara na  Vitengo mbalimbali , Watendaji wa  Kata, Makatibu Tarafa , Wadau wa kilimo cha pamba , Viongozi  wa AMCOS  katika ukumbi  wa ofisi ya Mkuu wa wilaya  ya Mkalama  na ambapo  Kampeni hiyo iliendelea katika  Kijiji cha Kinyangiri na Lyelembo vilivyopo  Kata ya Kinyangili.

Balozi Mwanry alitaja faida za zao la pamba kama likilimwa kwa tija na kimkakati kuwa  litaongeza uzalishaji  kutoka kilo 100- 250 ambao wakulima wanapata sasa kwa heka Moja  na kufikia Kilo 2500 kwa heka moja.

Pamoja na hayo  Balozi Mwanry alieleza kanuni mbalimbali za kilimo cha pamba ikiwa ni pamoja na kuandaa shamba kwa wakati , kupanda kwa wakati  na kwakutumia vipimo stahiki cha Rula mbili  kati  ya shimo na  shimo na  rula moja kati ya Mbegu na mbegu , kupalilia kwa wakati na kufuata hatua za kupalilia , kuvuna kwa wakati  pia kuchoma masalia ya mazao ambapo yasipo chomwa yanapelekea kuzalisha wadudu wanaoshambulia  zao hilo pia aliwataka kunyunyiza dawa kwa wakati.

‘’Ninawashauri  Wananchi   kutumia fursa hii adhimu ambayo imekuja kwenu Mkalama fursa  hazitolewi f ursa zinachukuliwa ‘’. Aliongeza Balozi Mwanry.

Baadhi ya wananchi wameishukuru Serikali kwa fursa hiyo na kuahidi watafuata sheria na kanuni za kilimo bora ili kuongeza tija katika uzalishaji wa zao la pamba wilayani Mkalama.

Ziara hii inaendelea leo  Oktoba 3 katika Kata ya Mwangeza.