ZAIDI YA WATOTO ELFU SITINI KUPATIWA DAWA ZA MINYOO TUMBO

Imewekwa kwenye: November 15th, 2022

Watoa huduma za Afya Wilayani Mkalama wametakiwa kutoa elimu na kuhamasisha  Wazazi na walezi kuhakikisha wanaruhusu Watoto kupatiwa  dawa  za minyoo tumbo ili kuwakinga na  madhara ya ugonjwa huo.

Mkurugenzi Mtendaji wa Halmashauri ya Wilaya ya Mkalama Bi. Asia Messos amesema hayo mapema leo Novemba 15. 2022 wakati akifungua mafunzo  kwa washiriki takribani 237 watakaotekeleza zoezi la kugawa dawa  za kutibu na kukinga maambukizi ya minyoo ya Tumbo, mafunzo yaliyofanyika katika ukumbi wa Sheketela Wilayani Mkalama.

‘’Serikali kupitia waaalamu wake hutoa maelekezo ya namna bora ya kuhudumia  wananchi wake, hivyo mafunzo haya yakawajengee uwezo  wa kufanya zoezi hili kwa umakini mkubwa, na  hakikisheni  Watoto  wote wenye  miaka 5 hadi 14 wanakingwa  kwa kupatiwa vidonge dhidi ya  ugonjwa wa minyoo na tumbo’’ Aliongeza Bi Messos.

Aidha Bi Messos alisema kuwa japo magonjwa hayo yalikuwa hayapewi kipaumbele  lakini yamesababisha madhara  mengi kwa jamii kama vile maumivu ya muda mrefu , Ulemavu , Umasikini , Ukuaji duni hivyo kuwataka kuwa chachu  kwa jamii na kupunguza  athari hizo hususani kwa Watoto kushindwa kumudu masomo vizuri.

‘’Nimeambiwa hapa na Mganga Mkuu kuwa pamoja na magonjwa haya hayapewi kipaumbele nimeambiwa hapa kuwa takribani  watu Billioni mbili  Duniani kote wapo hatarini  kupata magonjwa hayo na Nchini Tanzania takribani watu Millioni Tano wameshaambukizwa magonjwa haya’’. Alisisitiza Bi. Messos

Mratibu wa Magonjwa  yasiopewa kipaumbele Dr. Julius Nyenje amesema kuwa takribani Watoto 61,247 wenye miaka 5 hadi 14 wanatarajiwa kupatiwa chanjo ya Minyoo Wilayani Mkalama hivi karibuni.