zaidi ya Hatimiliki za kimila 900 zagaiwa Wilayani Mkalama

Imewekwa kwenye: October 28th, 2022

Imeelezwa kuwa mpango wa matumizi  bora  ya Ardhi ya kijiji ndio suluhisho  sahihi la kuzuia  matumizi yasiyo endelevu ya raslimali ya Ardhi .

Hayo  yamesemwa  na  Mwenyekiti  wa Halmashauri ya wilaya  ya Mkalama ambaye pia ni Diwani wa Kata ya Gumanga  Mhe. James Mkwega  wakat i akikabidhi  hati za umiliki wa kimila Mia Tisa (900) Oktoba 28 2022 katika Kata ya Mpambala  Wilayani Mkalama.

‘’Tunajua kuwa kumekuwepo  migogoro mingi  ya umiliki wa  matumizi ya ardhi  katika maeneo  yenu kwa sababu mbalimbali  ikiwepo wananchi kutokuwa na hati miliki za Ardhi , hali hii imepelekea wananchi kutumia muda mwingi  kuhangaikia masuala ya kesi  za umiliki wa ardhi badala  ya kutumia muda huo katika kufanya shughuli za  kujiongezea kipato’’ Aliongeza Mhe. Mkwega.

Aidha Mhe. Mkwega  alisema zoezi hili niendelevu n hivyo kuwasihi wananchi kuheshimu na kufuata mpango wa matumizi bora ya ardhi  katika maeneo yao.

Mratibu wa mradi wa kurejesha Ardhi  iliyoharibika na kuongeza usalama wa chakula Kitaifa Bw.  Joseph  Kihaule   aliongeza kuwa miongoni mwa maeneo yanayolengwa na mradi huu katika zoezi la kugawa hatimiliki za kimila  katika wilaya  ni pamoja na msitu wa Munguli uliopo kata ya Mwangeza  kuuandaa kuutumia  katika biashara ya hewa ya ukaa itakayopelekea kukua kwa pato la jamii ya Wahadzabe na Wilaya kwaujumla.

Wakizungumza  kwa  nyakati  tofauti tofauti  baadhi ya wananchi wa Vijiji vya Mpambala, Mkiko, Nyahaa  na  Lugongo wameishukuru serkali kupitia ofisi ya Makamu wa Rais ( Mazingira ) kwa kugawa hati hizo kwao na kuongeza kuwa ugawaji wa hati hizo utaharakisha maendeleo yao na kuchochea kukua kwa uchumi.

Mradi wa kurejesha Ardhi iliyoharibika na kuongeza usalama wa Chakula  kwemye maeneo kame unatekelezwa kwa Halmashauri ya  Nzega iliyo Mkoa wa Tabora , Magu (Mkoani Mwanza) Kondoa ( Mkoani Dodoma), Mkalama ( Mkoani Singida ) na  Micheweni (Pemba).