WANANCHI WATAKIWA KUTUNZA MIRADI YA MAENDELEO KWA VIZAZI VYA BAADAE.

Imewekwa kwenye: November 10th, 2022

Mkurugenzi  Mtendaji  wa  Halmashauri  ya Wilaya ya Mkalama Bi. Asia Messos amewapongeza wananchi wa kijiji cha Mntamba  kwa kuchangia fedha katika  miradi ya maendeleo  na kujitolea  nguvu kazi  pamoja na mali zao.

Ameyasema hayo  leo  Novemba 9/2022  wakati  akikagua na kutembelea miradi  ya maendeleo iliyoibuliwa na wananchi hao  kwenye ziara yake ya kikazi inayoendelea Wilayani  hapa  ya kukagua miradi mbalimbali ya maendeleo pamoja  na usimamizi wa matumizi ya fedha za wananchi kwa Vijiji vya Nkinto , Makulo  na Mntamba.

Aidha aliwataka wajumbe wa Halmashauri ya Kijiji  kubuni vyanzo mbalimbali vya mapato ili kuendelea kuchochea miradi ya maendeleo  pamoja na kuhakikisha wanaweka fedha hizo benki kwa usalama zaidi.

Pia aliwataka wananchi kuendelea kulinda na kuitunza miradi yote inayotekelezwa Wilayani hapa ili idumu kwa  vizazi vijavyo.

Katika hatua nyingine alikemea vikali suala la Lambalamba linalotaka kushamiri Wilayani hapa na kusema kuwa yeyote atakayebainika kushirikiana na waganga hao wajadi hatua kali za kisheria zitachukuliwa dhidi yake kwani vitendo hivyo vinachochea migogoro na uvunjifu wa amani  katika jamii.

Naye  Diwani  wa kata ya Nkito Mhe. Reuben Mhai aliishukuru Serikali ya awamu ya Sita kwa kutoa fedha nyingi katika Kata hiyo kwaajili ya ujenzi wa Miradi mbalimbali ya maendeleo ambapo alisema kuwa watahakikisha wanaunga mkono juhudi za Serikali kwa kusimamia vyema miradi hiyo na kuchangia katika shughuli mbalimbali za maendeleo.

Katika ziara hiyo aliungana na Wakuu wa Idara na Vitengo wa Halmashauri ya Wilaya ya Mkalama kukagua Maendeleo ya ujenzi wa  darasa moja shule ya Sekondari  Nkinto, mradi wa Shule madarasa mawili (SM2)  Sekondari  ya Nkinto ,Ujenzi wa zahanati katika kijiji cha Makulo  , Ujenzi wa  Zahanati  kijiji cha Mntamba ambayo imejengwa kwa nguvu za Wananchi pamoja na Nyumba mbili za walimu kijiji cha Mntamba zilizojengwa kwa nguvu za wananchi.

Aidha Bi. Asia (Mkurugenzi Mtendaji) alizidi kuupongeza uongozi wa Serikali ya Kijiji cha Mntamba kwa ubunifu wao wa kujenga nyumba ambazo kimsingi zimegharimu kiasi kidogo cha fedha ikilinganishwa na miradi mingine ya iana hiyo.