'WANANCHI TUUENZI MUUNGANO KWAKUFANYA KAZI KWA BIDII' AMESEMA DC MACHALI

Imewekwa kwenye: April 20th, 2023

MKUU wa Wilaya ya Mkalama , Mhe.Moses Machali, amewataka wananchi kuwa wazalendo na kuuenzi Muungano kwa kufanya kazi kwa bidii.

Aidha, amewataka wananchi kuendelea kuunga mkono juhudi zinazofanywa na Serikali ya awamu ya Sita inayoongozwa na Rais Dk.Samia Suluhu Hassan kwakulinda na kutunza miundombinu ya barabara isiharibiwe.

Ameyasema hayo leo April 20, 2023 wakati akizungumza na wananchi wa Kata za  Kikhonda na Nduguti kijiji cha Mwando kwenye mkutano wa hadhara  ikiwa ni maandalizi ya kuelekea maadhimisho ya miaka 59 ya Muungano wa Tanganyika na Zanzibar.

Machali amesema wananchi wanatakiwa  kuonyesha uzalendo na kutii  sheria zinazowekwa na mamlaka husika ili kulinda na kutunza miradi  mbalimbali ikiwamo ya barabara kwani serikali inatumika fedha nyingi kuigharamia.

"Ninatoa maelekezo kwa yeyote atakayekutwa anaharibu miundombinu ya barabara kwa kupitisha ng’ombe au mkokoteni barabarani faini yake ni shilingi  elfu tano  kwa kila ng’ombe au kifungo cha mwaka mmoja jela au vyote kwa pamoja," alisema Mhe. Machali.

Amesema katika  kipindi cha  miaka 59 ya muungano, Tanzania inajivunia mafanikio makubwa ikiwa ni pamoja na kutatua kero za muungano  kwa kuimarisha umoja, mshikamano  na usalama uliopo nchini.

Nao baadhi ya wazee waliokuwepo kabla na baada ya uhuru wamesema kuwa wanajivunia muungano kutokana na hapo awali huduma za jamii  hazikuwepo Wilayani Mkalama walilazimika kuzifuata  Wilaya ya Singida lakini sasa huduma zinawafuata hadi kwenye maeneo yao.

Walisema baadhi ya huduma wanazozipata sasa katika Wilaya ya Mkalama ni pamoja na uwepo wa Shule nyingi za Sekondari na msingi, barabara, umeme na huduma za afya ambazo sasa zinapatikana katika zahanati,vituo vya afya na hospitali ambazo zimejengwa na serikali.

"Maendeleo makubwa yamepatikana ndani ya muungano huu, hivyo tunaahidi kuwaenzi waasisi wa muungano  Mwalimu Julius Kambarage Nyerere na Sheikh Abeid Amani Karume," wamesema wazee hao.