WAKULIMA WILAYANI MKALAMA KUUNGA MKONO JUHUDI ZA SERIKALI KWA KULIMA ZAO LA PAMBA

Imewekwa kwenye: October 4th, 2022

Wananchi  wa vijiji  vya  Mwangeza, Munguli, Endasiku  pamoja na Ikolo wameishukuru serikali ya awamu ya sita kupitia Bodi ya pamba Tanzania kuwapa elimu ya kilimo bora cha zao hilo inayolenga kuongeza tija katika uzalishaji na kupelekea  kukuza vipato vyao.

 Wamesema hayo mapema leo katika kampeni  ya  kuhamasisha zao la pamba kulimwa wilayani hapa kama zao la kimkakati .

 Aidha  wamesema  mafunzo hayo  yamekuja  muda muafaka ambapo wakulima wa zao la pamba walikata tamaa , na kuongeza  kuwa   wamepokea maelekezo ya serikali  na kuahidi kufuata utaratibu  na njia bora za kilimo cha pamba ambapo hapo awali walikuwa wakitumia kilimo cha Kienyeji  na kupelekea mavuno machache.

“ Tunaishukuru serikali inayoongozwa  na  Mama yetu mpendwa  Rais Samia  kumtuma Balozi wa zao la Pamba Nchini kufika kwenye maeneo yetu kuhamasisha kilimo cha pamba,  chenye tija  tutazingatia mafunzo haya maana hapo awali tulikua tunalima mashamba makubwa halafu tunapata mavuno kidogo’’ Ailiongeza  Elias Mkilya miongoni mwa wakulima wa zao la pamba.

Pamoja na hayo  wameiomba  serikali  kuwapa  pembejeo  kwa wakati ili waweze kujiandaa mapema na  kuleta mapinduzi  katika  uzalishaji  huku  wakiomba pindi mazao yatakapo kuwa tayari wawe  na uhakika wa soko ili wasikae na pamba kwa muda mrefu kwani wamelenga kujikwamua kiuchumi

Kampeni hii itaendelea kesho tar 04/10  katika Kata ya Ibaga wilayani Mkalama.