Wakulima kujiandaa mapema na msimu wa Kilimo ili kuongeza uzalishaji

Imewekwa kwenye: October 26th, 2022

Mkuu wa  Wilaya ya Mkalama Sophia Mfaume Kizigo amewataka wakulima kujiandaa mapema na msimu wa kilimo kwa kufuata njia  bora za kilimo ili kuwa na chakula cha kutosha na kukuza uchumi wao binafsi na Taifa kwa ujumla.

Ameyasema hayo jana katika ziara yake ya kikazi ya kusikiliza na kutatua kero za  wananchi katika kijiji cha Ishinsi Kata ya Msingi Wilaya ya  Mkalama.

Aidha, Mhe. Mkuu wa Wilaya Kizigo aliwataka wananchi kutumia fursa iliyotolewa na Serikali ya kusajili wakulima wote kwenye mfumo ili waweze kupata ruzuku ya mbolea  kwa bei nafuu.

‘’ninawashauri wakulima kujisajili ili mpate ruzuku ya mbolea, Serikali imesikia kilio chenu kutokana na bei ya mbolea kuwa juu sana , kuna faida kubwa sana za kukopeshwa mbegu na Serikali’’.

Hata hivyo aliwataka wananchi  kuibua miradi ili Serikali inapotoa fedha iwe rahisi kupeleka sehemu ambayo tayari  kuna kitu kinaendelea .

‘’Ninaomba wananchi muwe tayari kuanzisha maboma ili inapotokea tumepata fungu Serikalini iwe rahisi kupeleka sehemu yenye  mradi tayari, anayepewa lifti ni yule aliyepo barabarani’’ Aliongeza Dc Kizigo.

Hata hivyo, alisema kuwa serikali ya awamu ya Sita imelenga kutatua kero za Wananchi katika masuala ya Afya , Elimu ,Kilimo , Maji  , Umeme  na huduma hizo kumfikia Mwananchi popote alipo  kwa ustawi wa jamii.

Afisa kilimo , Mifugo na uvuvi  Wilaya ya Mkalama  Selemani  Msunga  alisema kuwa Serikali imekusudia kufanya mapinduzi makubwa katika sekta ya kilimo na sasa imeanza kuandikisha wakulima katika mfumo ili wapate ruzuku ya mbolea  na kusema hadi sasa Takribani Wakulima 7200 wameonekana kwenye mfumo na zoezi linaendelea huku akiwataka wakulima kuendelea kujitokeza kwa wingi kutumia fursa hiyo.

Aidha, Bw. Msunga aliongeza kuwa Alizeti itabaki kuwa  zao la kimkakati wilaya ya Mkalama licha ya changamoto zilizojitokeza  Msimu wa Kilimo wa mwaka jana ambapo Serikali ilitoa mbegu ambazo hazikuwa na mavuno mazuri kwa wakulima na kuongeza kuwa kwa msimu wa mwaka huu 2022 Serikali itaendelea kutoa mbegu zilizo bora ili kuhakikisha zao la Alizeti linalimwa kwa wingi.

Baadhi ya wananchi wa kata ya Msingi walimshukuru Mkuu wa Wilaya kwa kufika kwenye maeneo yao ili kusikiliza kero zao na kutatua changamoto walizonazo wamesema wanaimani na serikali ya awamu ya Sita kuwa watawapelekea huduma nyingi za maendeleo ikiwepo  umeme kufika kila kitongoji ili wananchi waweze kukua kiuchumi na kukuza pato lao binafsi na Halmashauri.