WAJUMBE WA SERIKALI YA VIJIJINI HAKIKISHENI MNASIMAMIA MIRADI YA MAENDELEO IPASAVYO.

Imewekwa kwenye: November 8th, 2022

Wajumbe wa Halmashauri ya Serikali ya  vijiji vya Munguli, Ikolo na Endasiku wametakiwa kusimamia miradi yote inayotolewa na Serikali kwa niaba ya Wananchi na kuitambulisha kwao ili kuwajengea ufahamu wa nini kinaendelea katika maeneo yao.

Mkurugenzi Mtendaji wa Halmashauri ya Wilaya ya Mkalama Bi. Asia  Messos ameyasema hayo leo tar 8/11 /2022  katika ziara yake ya kikazi  kwa Vijiji vya Munguli, Ikolo na Endasiku Kata ya Mwangeza wilayani Mkalama.

Aidha alieleza lengo la ziara yake kuwa ni kukagua miradi ya maendeleo inayotekelezwa wilayani hapa pamoja na kujiridhisha fedha zinazochangwa na wananchi zimefanya shughuli iliyokusidiwa pamoja na gharama za miradi  kama zinaendana na fedha halisi.

Pamoja na hayo aliwataka Wajumbe wa Halmashauri ya Serikali ya vijiji kusimamia ukusanyaji  wa mapato pamoja na kuandaa taarifa ya mapato na matumizi ili kuweka  wazi kwa wananchi kwani wao ndio wamekuwa wachangiaji wa fedha za maendeleo katika maeneo yao.

‘’Ninakuagiza Mtendaji wa Kata kuwasimamia watendaji wa Vijiji pamoja na Wenyeviti wa Vijiji kuandaa taarifa ya mchanganuo wa makusanyo yote ya michango ya Wananchi na ninawaagiza kuhakikisha mnafanya vikao vya kisheria kwani huko ndiko mtatoa taarifa za mapato na matumizi yatokanayo na michango yaO’’ Aliongeza DED Messos.

Hata hivyo alimuagiza mtendaji wa Kata  kuhakikisha ndani ya miezi mitatu wanakamilisha Mradi wa ujenzi wa  Madarasa mawili ujulikanayo kama  Shule Madarasa Mawili (SM2) ili kuhakikisha changamoto ya madarasa inatatuliwa wilayani hapa na wanafunzi wasome bila usumbufu wa kukosa madarasa.

Mkuu wa Kitengo cha Sheria Wilayani Mkalama Bi Lilian Kasanga alitumia kikao hicho kuwataka wanaosimamia miradi ya ujenzi kuhakikisha wanakuwa na mikataba baina yao na Wakandarasi ili kuepusha usumbufu utakaojitokeza kabla ya kukamilisha kazi pamoja na  kuunda kamati ya ujenzi na Manunuzi ili kuhakikisha vifaa vyote vya ujenzi  vinanunuliwa na kusimamiwa na kamati husika.

Ziara hiyo ni Endelevu na kesho  tar 9/11 2022 itafanyika Kata ya Nkinto.