VIJANA WAASWA KUJIHADHARI NA MAAMBUKIZI MPYA YA VVU

Imewekwa kwenye: December 1st, 2022

Vijana wametakiwa kujitambua  na kuthamini Maisha  yao kwa kujikinga na maambukizi mapya ya VVU kwani ndio nguvu kazi ya Taifa.

Afisa Tarafa wa Tarafa ya Nduguti Bw. Remigius  Ngole ameyasema hayo mapema leo  katika maadhimisho ya Siku ya UKIMWI  Duniani alipo mwakilisha  Mkuu wa Wilaya ya Mkalama katika maadhimisho hayo yaliyofanyika katika Kijiji cha Gumanga Kata ya Gumanga Wilaya ya Mkalama.

‘’Vijana ni kundi linalokabiliwa na changamoto kubwa ya maambukizi mapya ya VVU Nchini na  takwimu za maambukizi mapya ya VVU  zinaonyesha  kwamba 40% ya  maambukizi yametokea kwa vijana na katika hao 80% ni vijana wa kike’’. Aliongeza Bw. Ngole

Hata hivyo aliongeza kuwa maambukizi mapya ya virusi vya UKIMWI miongoni mwa wanaume, Wanawake na Vijana wenye umri kati ya miaka 15-49 ni mkubwa .

Aidha aliongeza kwakusema Takwimu za mwaka 2022 kutoka January hadi Oktoba 2022 waliopimwa ni 17,273 ambapo Wanaume ni 6741 na Wanawake ni 10,532 kati yao 245 waligundulika kuwa na maambukizi ya VVU sawa na 1.4%, Wanaume walikuwa  78 sawa na 1.1% na Wanawake walikuwa 165 sawa na 1.5% huku Vijana wenye umri wa miaka 15-26 waliopimwa ni 1075 waliogundulika kuwa na maambukizi mapya ni 155 sawa na 1.4%.

Sanjari na hayo Mwenyekiti wa Halmashauri ya Wilaya ya Mkalama Mhe. James Mkwega aliwataka wananchi kuwa na desturi ya kupima afya zao  wakibainika wana maambukizi waanze kutumia dawa mapema ili kufubaza virusi na kuchukua tahadhari ya kuambukiza wengine.

Kauli Mbiu ya Maadhimisho ya Mwaka huu ‘’MKALAMA BILA UKIMWI INAWEZEKANA, PIMA, JITAMBUE, ISHI, IMARISHA USAWA ‘’