USALAMA WA WATOTO WILAYANI MKALAMA SIO SHWARI

Imewekwa kwenye: February 20th, 2023

Mkuu wa Wilaya ya Mkalama Mhe. Moses  Machali  amesema kuwa hali ya usalama wa Maisha ya Watoto wilayani Mkalama  sio shwari kutokana na Watoto  kukumbwa na vifo vitokanavyo na kutumbukia kwenye madimbwi na mashimo ya choo ambayo hayajafunikwa .

Mhe. Machali amesema hayo leo Februari 20, 2023 kwenye kikao kazi cha Waratibu wa Elimu Kata, Walimu wakuu wa Shule za Sekondari na Msingi, Watendaji wa Kata na Vijiji , Maafisa maendeleo ya jamii Pamoja na wakuu wa Idara na Vitengo kilichofanyika katika ukumbi wa Halmashauri ya wilaya ya Mkalama.

‘’Mashimo yanachimbwa yanaachwa wazi maji yanajaa na hii mvua inavyonyesha hivi majuzi kumetokea vifo vya namna hii, nilivyofanya uchunguzi wangu nikasikia wananchi wanasema wakifa watu wawili afadhali maana tumezoea kufa hata zaidi ya Watu  ishirini nilishangaa sana’’ Alisema  Mhe. Machali

Aidha Mhe. Machali aliwataka viongozi hao kuhakikisha wanalinda haki za Watoto na raia ikiwepo haki ya kuishi, kwa kuwataka watendaji wa Kijiji wakishirikiana na Watendaji wa Kata kutekeleza jukumu hilo kupitia elimu kwa wananchi waochimba mashimo kuhakikisha yanafunikwa ili kuzuia vifo vinavyoweza kuzuilika.

‘’kwa tafsiri hii baada ya kutoa maelekezo haya nitakaposikia kuna kifo chochote kinatokana na Shimo wewe Mtendaji nitaaza na wewe ninawapa kipindi cha wiki moja nendeni mkashughulikie suala hili  sitaki kusikia vifo vinavyotokana na uzembe’’ Alisisitiza Mhe. Machali

Pamoja na hayo  amewataka watendaji hao kuongeza juhudi na kasi kwenye kuhakikisha ulinzi wa mali na Raia kwani serikali iliwaamini na kuwapa nafasi hizo za uongozi.

Hata hivyo amewataka Watendaji hao kuwachukulia hatua kali za kisheria wananchi watakao kiuka  maelekezo yote aliyoyatoa leo .