Stadi za maisha ni muhimu kwa ukuaji na ustawi wa Watoto

Imewekwa kwenye: July 12th, 2022

Imeelezwa kuwa ufundishaji mahiri  unaozingatia  stadi za maisha ni tunu na nguzo muhimu  inayomwezesha mwanadamu  kujikomboa kifikra kupitia ujuzi ama maarifa   kwa lengo la kuendesha maisha yake.

Hayo yameelezwa na mdhibiti ubora wa shule  Wilaya ya Mkalama Adam Majid  kwenye ufunguzi wa mafunzo ya wa hojaji wa kujitolea watakaoenda kufanya kazi ya utafiti wa stadi za maisha kwa vijana wa miaka 13 hadi 17.

Bwana Majid amesema  kuna ushahidi unaonesha dhahiri  kwamba stadi za maisha zimekuwa na  matokokeo chanya  kitaaluma ikiwemo kuwasaidia vijana  kufahamu na kudhibiti hisia zao , kupanga na kufikia malengo chanya , kuhisi na kuonyesha huruma kwa wengine ,kufanya maamuzi sahihi.

Pamoja na hayo aliwataka vijana hao kuwa waaminifu  na kufanya kazi kwa weledi na kuwa mabalozi wazuri  kuendana na mazingira pamoja na tamaduni za jamii  husika Ili kupata utafiti mzuri wa namna vijana hao wanavyoishi na kushiriki katika shughuli mbalimbali za kimaendeleo pamoja na kutatua matatizo yao binafsi  na ya wengine.

Nae  Mratibu wa utafiti  na upimaji wa stadi za maisha Wilaya ya Mkalama  Issa Mtaki amesema zoezi la upimaji wa stadi  maisha na Tunu  linafanyika kwa umakini mkubwa katika  Nchi za Kenya ,Uganda  na Tanzania na Kwa Tanzania wilaya 34  ikiwemo wilaya ya Mkalama .

"Zoezi hili limepewa Baraka zote kutoka Kwa viongozi wakubwa na wametupa ushirikiano Mkubwa , zoezi  hili linaenda kulenga zaidi kuwapima watoto hasa katika mchakato wa ujifunzaji wa maisha hasa Katika  maisha na mazingira yao au shule kwahiyo tukiangalia watoto wenye umri wa miaka 13 hadi 17  ni watoto ambao either wapo shule au nyumbani kwahiyo tunaenda kujua wamepata stadi gani au masuala Gani ya tunu tunayokusudia vijana wetu wapate". Aliongeza Bwana Mtaki.

Pamoja na  hayo aliwashukuru mashirika wadau wanaoteleleza mradi huu ambayo aliwataja Milele Zanzibar Foundation , Uwezo Tanzania  pamoja na shirika la Mkalama Paralegal  ambalo pia linatoa msaada wa kisheria wilayani hapa.

Patrick Immanuel pamoja na Beatrice Mpazi washiriki wa mafunzo hayo wameshukuru kuwa miongoni mwa washiriki ,wamesema watafanya kazi hiyo Kwa uaminifu na wanaamini fursa hii  italeta mabadiliko chanya katika maisha hivyo kuwataka jamii kupokea fursa hii Ili watoto waweze kujitegemea wenyewe na kuleta mapinduzi ya kiuchumi ndani ya familia ,Jamii na Taifa Kwa ujumla.

Tangu mwaka 2005 Tanzania ilianzisha mchakato wa kutengeneza Mtaala wa ufundishaji  mahiri kwa elimu ya sekondari na mwaka 2007  kwa upande wa elimu ya msingi.