SIKU TATU ZA BALOZI WA PAMBA TANZANIA WILAYANI MKALAMA KUZAA MATUNDA

Imewekwa kwenye: October 4th, 2022

Balozi wa zao la Pamba  Nchini  na Mkuu wa  Mkoa  Mstaafu  Mhe. Agrey Mwanry  leo amehitimisha ziara yake  ya kuhamasisha  kilimo cha zao  hilo kwa  siku tatu Wilayani hapa  katika   kijiji cha Ilongo na  na Igengu Kata ya  Ibaga  na kijiji cha Mpambala na Nyahaa  Kata ya Mpambala.

Akiongea na wakulima wa maeneo hayo aliendelea kuwasisitiza wakulima kufuata mbinu bora za kilimo cha pamba ambazo  zimefanyiwa  utafiti  kutoka  Taasisi ya TARI na bodi ya Pamba kushirikiana na Nchi ya Brazil  ambao ulibaini pamba ikilimwa vizuri itapelekea Mkulima  wa wilaya ya Mkalama  kupata  Kg. 2500 kwa hekari kama ilivyo kwa Nchi za Agentina , Angola , Buknafaso  pamoja na  Misri.

Katika mafunzo hayo aliwataka  wananchi kuandaa shamba mapema na kulitifua pia kuacha Ardhi  ipumue hadi majani yaanze kuota ndipo waanze kukatia na kuweka mbegu ili kuufanya udongo kupoa na kupumua.

Hata hivyo aliendelea kuwasisitiza Wakulima kuhusu matumizi ya mbolea ya Samadi katika zao hilo ambapo aliongeza kuwa mbolea ya Samadi ina uwezo wa kutunza unyevu nyevu kwa muda mrefu ambao utasaidia zao la pamba kustawi  vizuri.

‘’Mbolea ya samadi ni nzuri sana katika kilimo cha pamba kwasababu tunaweza kuipata majumbani  mwetu  ukisafisha banda la Kuku, wakinamama wakizoa majivu tayari hiyo ni mbolea  ambayo hauhitaji gharama kubwa kuipata’’ aliongeza Balozi Mwanry.

’’ Serikali imeamua kuniteua kuwa balozi wa pamba Tanzania ulishawahi kusikia  balozi wa matikiti au mchicha?  sio kwamba imelenga kujifurahisha bali kukuza uzalishaji wa pamba nakuongeza tija  katika zao hilo’’ Alisema Balozi Mwanry.

Aidha  aliongeza kuwa kwa takribani miaka mitatu sasa  uzalishaji wa zao la pamba ulishuka kutokana na mvua kuwa juu  ya wastani kwa  2020/2021  na kuwa chini ya wastani kwa mwaka 2021/2022 ambapo .

‘’Uzalishaji wa zao hili halihitaji mvua kubwa kulizalisha bali inahitaji mvua ya kawaida sana kwa asilimia 50 tu kama mnavyojua Nchi ya Misri ni jangwa lakini ndio NChi pekee inayozalisha pamba nzuri na yenye ubora wa hali ya juu’’. Alisisitiza Balozi Mwanry.

Pamoja na hayo alikutana na wakuu wa Idara na Vitengo wa halmashauri ya wilaya ya Mkalama kufanya majumuisho ya siku  tatu alizotumia katika wilaya ya Mkalama wakati akihamashisha zao hilo ambapo aliwataka Maafisa Kilimo, Maafisa Ugani pamoja na wataalamu wote kuwatembelea wakulima kila muda ili kujua maendeleo yao pamoja na changamoto zinazowakabili.

Sanjari na hayo , Mkurugenzi  Mtendaji  wa  halmashauri  ya wilaya ya Mkalama Bi. Asia Messos alimhakikishia Balozi Mwanry kuwatembelea Wakulima  pamoja na kuwashauri wananchi juu ya kilimo bora cha pamba na kusimamia kwa ukaribu ili kuwa na tija kwa zao hilo ambalo litapelekea pato la halmashauri kukua.

‘’sisi kama wilaya tutahakikisha tunawasapoti wakulima wadogo ili kuwa na tija ya uzalishaji katika zao hili’’ aliongeza  Bi. Messos.

Paia alimshukuru Balozi wa pamba Tanzania kufika  wilayani  Mkalama na kuongea na wakulima  ambapo alisema kama wilaya watahakikisha zao hilo linalimwa kwa wingi wilayani hapo.