REV. KABEA MAKAMU MWENYEKITI MPYA

Imewekwa kwenye: August 2nd, 2023

Baraza la madiwani Wilaya ya Mkalama Leo (Agosti 2, 2023) limemchagua kwa kura zote za ndio Mhe. Emmanuel Kabea kuwa Makamu Mwenyekiti wa Halmashauri ya Wilaya ya Mkalama kwa kipindi cha mwaka 2023/2024 ambaye anachukua nafasi ya Mhe. Bosco Samweli ambaye amemaliza muda wake.

Akitangaza matokeo hayo kwa niaba ya Mkurugenzi Mtendaji wa Halmashauri ya Wilaya ya Mkalama, Afisa Maendeleo ya Jamii Wilaya, Bw. Mohamed Atiki amesema.

"Waheshimiwa Madiwani kwa mamlaka niliyopewa naomba kutangaza matokeo ya Makamu Mwenyekiti kama ifuatavyo, wajumbe waliopiga kura ni 24, Kura zilizoharibika hakuna, Kura za  Hapana hakuna , Kura za ndio ni 24 kwa matokeo hayo naomba kumtangaza  Mhe. Rev. Emmanuel Kabea kuwa ndio Makamu Mwenyekiti mpya wa Halmashauri’’ Alisisitiza Bw. Atiki

Mkuu wa Wilaya ya Mkalama, Mhe. Moses Machali ameshirikia katika zoezi hilo ambapo alimpongeza Makamu Mwenyekiti kwa kuaminiwa na Chama pamoja na Madiwani kupewa nafasi hiyo hivyo kumtaka kuwapa ushirikiano Madiwani, Wakuu wa Idara na Vitengo kwa ajili ya manufaa ya wananchi wa Mkalama.

‘’Mimi nikupongeze kwa kuamini na madiwani, hivyo nakutakia utumishi uliotukuka , wape ushirikiano Madiwani, wape ushirikiano Wakuu wa Idara ili tuweze kusukuma maendeleo ya wananchi na kusomeka vizuri huko Duniani’’ Alisisitiza Mhe. Machali.

Naye Mwenyekiti wa Chama Cha Mapinduzi( CCM) Bw. Lameck Itungi amewapongeza Madiwani kwa kazi kubwa ya kumchagua Makamu Mwenyekiti wa Halmashauri ambapo amesema wameridhishwa na kazi kubwa wanayofanya madiwani hivyo kuwataka kushirikiana na Makamu Mwenyekiti ili kuweza kuongeza kasi ya utekelezaji wa Miradi ya maendeleo katika Wilaya ya Mkalama.

Makamu Mwenyeki Mhe. Emmanuel Kabea amewashukuru madiwani kumwamini na kumpigia kura zote za ndio ambapo ameahidi kufanya kazi kwa  ushirikiano na kuwalipa uaminifu kwa maslahi mapana ya Wilaya.