Rc Singida awataka viongozi wa dini na serikali wahamasishe zoezi la Sensa

Imewekwa kwenye: September 18th, 2021

Mkuu wa Mkoa wa Singida Dkt Binilith Mahenge amewapongeza wananchi wa Kitongoji cha Gajaroda wilaya ya  Mkalama kwa kuendelea kuwapa  makarani wa sensa ya majaribio Ushirikiano katika kutekeza majukumu yao  na kufanikisha zoezi hilo kwa 90%.

Ameyasema hayo Mapema leo katika ziara yake ya kikazi ya kutembelea na kujionea namna zoezi la Sensa ya Majaribio  linavyoendelea  katika Kitongoji cha Gajaroda Kijiji cha Dominiki Kata ya Mwangeza  wilaya ya Mkalama Mkoani Singida .

Aidha Dkt Mahenge amesema kuwa lengo la serikali ni kuwa na takwimu sahihi za wakazi wa maeneo husika ikijumuiya takwimu za watu , Makazi yao ,Mifugo pamoja na mali wanazomiliki ili kurahisisha mipango ya serikali pamoja na vipaumbele kwa kila eneo.

Katika hatua nyingine amewataka Viongozi mbalimbali kila mtu kwa nafasi yake kuhamasisha wananchi juu ya umuhimu wa Sensa  na kulipokea zoezi hilo kama fursa kwao kwa maendeleo yao na kwa Mkoa kwaujumla.

‘’lengo kubwa ni kuisaidia serikali kuwa na taarifa kamili ni nini kinafanyika kwenye maeneo yao na watu wanaoishi kule wanajishughulisha na nini itasaidia serikali kuwaingiza kwenye mipango ya maendeleo,pia tunapojua idadi ya Watoto au watu inaisaidia serikali kujua kuwa wapeleke huduma gani kwahiyo  wananchi wakijitokeza kwa wingi ndio watakula keki kubwa yaTaifa’’ Ameongeza Dkt Mahenge RC Singida.

Awali akimkaribisha Mkuu wa Mkoa ,Mkuu wa wilaya ya Mkalama Mhe.Sophia Kizigo amesema kuwa wananchi wamepokea zoezi hilo vizuri kwani  walipewa hamasa kutoka  kwa Kamisaa wa Sensa kitaifa Mhe.Anna Makinda huku akiomba kutatuliwa changamoto zilizojitokeza katika zoezi la Sensa ya  majaribio  ikiwa ni pamoja na uchache wa makarani pamoja na kuongeza siku   kwaajili ya kuhoji Dodoso kuu la Sensa kutokana na umbali uliopo kutoka kaya moja hadi nyingine.

Elifrida Yunde ambaye ni karani wa zoezi la Sensa  ya Majaribio Kitongoji cha  Gajaroda amesema kuwa anawashukuru wananchi kwa usirikiano wanaoutoa kwao huku akiongeza kuwa pamoja na changamoto wanazozipata mpaka sasa zoezi hilo limefanikiwa kwa  90% ambapo pia ameiomba serikali kuboresha Dodoso kwa Sensa ya wat una Makazi ya mwaka 2022 kutokana na Dodoso la majaribio kuwa refu.

 Baraka Joseph na Hilda Amsii ni miongoni mwa wananchi wa kitongoji  cha Gajaroda ,wamesema kuwa sensa hii ya majaribio imeonyesha taswira nzuri ya Sensa ya mwaka 2022 ambapo wameahidi kutoa ushirikiano wakutosha kwa serikali pamoja  na kuahidi kuwa mabalozi wazuri kwa wengine ambao hawajawa na mwamko kuhusu zoezi hili  ili serikali iweze kupeleka huduma muhimu kama kama vile maji,umeme,Hospitali pamoja na shule.

Zoezi la Sensa ya majaribio lilianza Semptember 8 mwaka huu na linatarajiwa kukamilika September 19 mwaka huu .

Kauli mbiu ikiwa ni ‘’SENSA KWA MAENDELEO JIANDAE KUHESABIWA’’