MADUME BORA YA MBEGU KULETA MAGEUZI YA KIUCHUMI WILAYANI MKALAMA

Imewekwa kwenye: April 6th, 2023

Waziri wa Mifugo na Uvuvi   Mhe. Abdallah Ulega amesema kuwa  uwepo wa madume bora ya kisasa ya Ng’ombe  aina ya BORAN yatafungua fursa za kiuchumi  kwa  wafugaji  Wilayani Mkalama  kwani  itaongeza uzalishaji   wa nyama  utakaopelekea  wafugaji  kupata soko ndani  na nje ya Nchi .

Ameyasema hayo  mapema  leo  April 6, 2023 katika hafla fupi ya kukabidhi  mbegu bora ya madume  Arobaini  (40) ya Ng’ombe iliyofanyika katika kijiji  cha Iguguno Kata ya Iguguno Wilayani Mkalama.

Aidha Mhe . Ulega ameongeza  kuwa  Serikali imedhamiria kuboresha Sekta  ya Mifugo  na kuwainua wafugaji  ili kuhakikisha wanaongeza kipato chao kupitia mifugo itakayoleta mageuzi kiuchumi kwa mtu  mmoja mmoja , Wilaya , Mkoa  pamoja na Taifa.

‘’Serikali ya awamu ya Sita inayoongozwa na Rais  Dkt. Samia Suluhu Hassan kwa kipindi cha miaka miwili   imedhamiria kuinua Sekta ya Mifugo  Nchini na kutoa zaidi ya Shillingi  Million 800 kununua madume  bora ya mbegu  ya Ng’ombe  366 ambayo leo hii inamgusa hadi mwananchi wa Mkalama lengo likiwa ni kuinua kipato cha mtu mmoja mmoja na kuleta mageuzi ya kiuchumi Wilayani hapa’’ Aliongeza Mhe. Ulega

Aidha alitumia hafla hiyo  kuwataka wafugaji kutumia madume hayo vizuri kutokana na malengo yaliyokusudiwa na serikali ili kuunga mkono  juhudi hizo zinazokusudia  Ng’ombe hao kupandisha Ng’ombe jike ili kuweza  kupata mbegu bora itakayoleta faida kwa wafugaji huku akiwaonya kutofanya  Ng’ombe hao kuwa kitoeo.

Awali akimkaribisha Waziri,  Mkuu wa Wilaya ya Mkalama,  Mhe. Mosses Machali  ameishukuru serikali kupitia Wizara ya Mifugo na Uvuvi  kutoa  madume ya Mbegu 40 katika Wilaya ya Mkalama ambayo yatagaiwa kwa Vikundi Arobaini  vya Wafugaji ambapo ameahidi kuwa watahakikisha wanasimamia vizuri Madume hayo ili kufikia malengo tarajiwa ya kuwa na mifugo bora  yenye mazao mengi yatakayochangia kuongeza na kukuza  Uchumi  kwa  kaya za wafugaji  na uchumi wa taifa na kuongeza uzalishaji wa mazo ya mifugo.

Naye Mbunge wa jimbo la Iramba Mashariki Mhe. Francis Isack Mtinga  aliongeza kuwa Halmashauri  ya Wilaya ya Mkalama ni miongoni mwa Halmashauri 8 kati ya Halmashauri 186 Nchini zilizopokea Madume hayo na kusema ni bahati ya pekee , huku akiomba Serikali kuongeza majosho kwaajili ya kuogesha mifugo ili  Wilaya ya Mkalama isiwe na  magonjwa yanayoshambulia mifugo sambamba na kuomba ujenzi wa soko kubwa la Mifugo likalopelekea wafugaji kuuza mifugo yao hapa Wilayani na kuongeza vipato vyao pamoja na kuongeza pato la Halmashauri kutokana na kupata ushuru kupitia soko hilo.

Akitoa neno la shukrani kwa niaba ya wananchi Wilayani hapa Mwenyekiti wa Halmashauri ya Wilaya ya Mkalama Mhe. James Mkwega ameishukuru serkali  kuwajali  wananchi  wa Wilaya ya Mkalama kupata Mbegu bora za Madume ilikuongeza uzalishaji na upatikanaji wa nyama wilayani hapo ambapo ameomba kujengwa kwa machinjio Wilayani ili Nyama hizo ziweze kuchinjwa mahali pazuri na kwa usalama ili  kulinda afya za walaji.