KONGAMANO LA HUDUMA ZA KIFEDHA WILAYANI MKALAMA

Imewekwa kwenye: August 19th, 2025

Mkurugenzi Mtendaji wa Halmashauri ya Wilaya ya Mkalama, Bi. Asia Messos, amewataka wafanyabiashara, wajasiriamali pamoja na watumishi Wilayani Mkalama kutumia ipasavyo huduma za kifedha ili kukuza uchumi wa mtu mmoja mmoja, jamii na taasisi kwa ujumla.

Bi. Messos alitoa wito huo mapema leo Agosti 19, 2025, katika ukumbi wa Sheketela uliopo Halmashauri ya Wilaya ya Mkalama, wakati akifungua Kongamano la Huduma Ndogo za Kifedha.

Ameeleza kuwa wafanyabiashara wengi wamezoea kutumia taasisi za kifedha kama benki pekee, lakini akasisitiza pia umuhimu wa kutumia Mfuko wa UTT AMIS, taasisi ya serikali iliyo chini ya Wizara ya Fedha, inayosaidia wananchi kujiwekea akiba na kuwekeza katika masoko ya mitaji.

Aidha, Bi. Messos alisisitiza kuwa Halmashauri ya Wilaya ya Mkalama imeendelea kutoa mikopo bila riba kwa makundi mbalimbali ya wananchi wakiwemo Wanawake, Vijana na Watu wenye Ulemavu, ikiwa ni sehemu ya mikakati ya kuinua kipato na kukuza uchumi wa wananchi.

Amewataka wanavikundi vinavyopatiwa mikopo hiyo kutumia fedha kwa malengo yaliyokusudiwa ili ziwe chachu ya maendeleo ya kiuchumi kwao na jamii inayowazunguka.