Jamii ya Wahadzabe inayoishi Kijiji cha Munguli wakabidhiwa Hati miliki ya Kijiji na Msitu wa asili ya Wahadzabe.

Imewekwa kwenye: November 28th, 2021

Jamii ya Wahadzabe inayoishi Kijiji cha Munguli Kata ya Mwangeza wametakiwa kutumia  hati miliki walizopewa kujiletea maendeleo na kushirikiana katika kutunza  msitu wa Asili wa wahadzabe ili kunufaika na msitu huo unaowapatia Matunda pori, mizizi  ,nyama na asali ambayo ilikuwa shauku yao ya muda mrefu.

Hayo yamesemwa na Diwani kata ya Mwangeza Mhe.Bosco Samweli ambaye pia ni Makamu mwenyekiti wa halmashauri ya wilaya  ya Mkalama wakati akikabidhi hati hizo kwa jamii ya Wahadzabe iliyofanyika katika Kijiji cha Munguli, Kitongoji cha kipamba wilaya ya mkalama.

Aidha Mhe.Bosco amesema kuwa hati hizo zikawe chachu ya wao kulinda Msitu wa asili ambao ulifanyiwa mchakato wa matumizi bora ya ardhi na hatimaye umekamilika hivyo kuwataka kuendeleza ushirikiano wao katika kuulinda na kuheshimu maeneo tengefu ikiwa ni pamoja na maeneo ya makazi, malisho, vyanzo vya maji pamoja na eneo la msitu.

Afisa Ardhi wilaya ya Mkalama Bw.Imikugwe Mwanitu amesema kuwa kupata hati hizo ni kuendelea kutoa  hati za kimila kwa jamii hiyo na kwa mtu mmoja mmoja ambaye anataka ardhi yake ifanyiwe mpango wa matumizi bora  ya Ardhi hivyo kuwataka viongozi wa Kijiji cha Munguli kutunza cheti hicho katika  hali ya usalama kwa manufaa ya kizazi kijacho.

Katika hatua nyingine Afisa Mazingira wilaya ya Mkalama Bw.Amon Sanga amesema  Halmashauri ya wilaya ya Mkalama kwa kushirikiana na timu ya shirika la ujamaa wa jamii katika kulinda raslimali (Ujamaa Community Resource Team)  walianza  mchakato wa kupata hati tangu mwaka 2018/2019 ambapo walianza upimaji wa maeneo yaliyotengwa hadi kukamilisha mchakato wa utoaji wa hati wa Kijiji na Msitu wa Munguli ilikurahisisha upatikanaji  wa hati miliki kwa maeneo mengine katika kutimiza takwa la kisheria.

Naye Afisa Uwanda kutoka  shirika la ujamaa wa  jamii katika kulinda raslimali (UCRT) Bw Julius Mando ameitaka jamii hiyo kutunza msitu wa Asili kwa faida ya jamii na kuhakikisha Ardhi yao inabaki salama na kupata manufaa kama wanavyopata jamii ya wahadzabe inayoishi Mkoa wa Manyara kupitia msitu wao walioingia mkataba na shirika la Carbon Tanzania.