HAKIKISHENI MNAKUWA WAADILIFU KWENYE KUKUSAYA MAPATO

Imewekwa kwenye: February 28th, 2023

Mkuu wa Wilaya ya Mkalama, Mhe. Moses Machali amewataka wasimamizi na wakusanya mapato wote kuhakikisha wanakuwa waaminifu katika kazi yao na kudhibiti mianya yote ya upotevu na utoroshaji wa  mapato unaosababisha hasara kwa Halmashauri.

Ameyasema hayo mapema leo wakati akiongea na wakusanya mapato na Timu ya Mapato ya Halmashauri ya Wilaya ya Mkalama (TASK FORCE) katika ukumbi wa Ofisi ya Mkuu wa Wilaya ya Mkalama.

‘’Leo tarehe 28 mwezi wa pili nakutana nanyi timu inayohusika na ukusanyaji wa mapato wa Halmashauri ya Wilaya ya Mkalama tumegundua kwamba ipo mianya ya upotevu wa mapato na zipo taarifa, usisubiri mpaka tuje tukufuate ukakamatwa utakuwa umepoteza kazi, hivyo utamuaga Mkeo utamuaga mumeo na Watoto wako, itakuwa ni hasara na  vilio katika familia yako’’ Alisisitiza Mhe. Machali

Aidha, amewataka watumishi hao kuwa waaminifu na kazi waliyopewa na kuaminiwa na Serikali kuhakikisha  kila pesa inayopatikana inawekwa Benki ili kuepusha ushawishi utakao pelekea kutumia fedha hizo .

‘’Hakikisheni mnakuwa waaminifu katika kazi na kila pesa mnayokusanya inaingia kwenye kapu letu la Halmashauri ya Wilaya ya Mkalama inayoongozwa hapa  na Bi. Asia  Messos na ole wake atakayeingia kwenye kumi na nane tutamshambulia kama Mpira wa kona’’ Aliongeza Mhe. Machali

Sanjari na hayo amemtaka Afisa mapato kuwa mbunifu katika kuibua vyanzo vipya vya mapato ili kuharakisha pato la Wilaya na kuagiza kuchukuliwa hatua kali za kisheria  kwa kampuni zote za ujenzi wanazofanya shughuli wilayani hapa ambazo hazilipi Ushuru wa Madini ya Ujenzi.

Bi.  Elizabeth Rwegasira,  Katibu Tawala wa Wilaya ya Mkalama pamoja na Mkurugenzi Mtendaji  Mtendaji wa Halmashauri ya Wilaya ya Mkalama, Bi. Asia Messos nao wamesisitiza uaminifu na umakini katika utendaji kazi kwa maslahi mapana ya Wilaya ambapo  wamesema kuwa uadilifu na ni zamu ya kazi utawapelekea kuendelea kuaminiwa na kupewa nafasi kubwa zaidi.