Dc Mkalama apiga Stop shughuli zote za Lamba lamba wilayani hapa

Imewekwa kwenye: February 26th, 2022

Mkuu wa wilaya ya Mkalama Mhe. Sophia Kizigo amepiga marufuku shughuli zote za  waganga wa jadi wanaotumia ramli chonganishi (lamba lamba) zinazoendelea wilayani Mkalama kwani zinaashiria uvunjifu wa amani  wilayani hapa .

Amesema hayo wakati akitoa salamu za serikalini katika  Mkutano wa kawaida wa baraza la madiwani wa robo ya pili kwa Mwaka wa fedha 2021/2022  lililofanyika katika ukumbi wa Sheketela uliopo halmashauri ya wilaya ya Mkalama.

Amewataka viongozi wote ndani ya wilaya kuungana na kupinga suala hilo linaloleta uvunjifu wa amani kwani wananchi wamekua wakitozwa fedha ili kuwaleta waganga hao ambao wamekua wakisema wanatoa uchawi  kitu kinacholeta taharuki na chuki katika jamii.

  "Kazi yetu ni kuhakikisha usalama wa raia na Mali zao ,kuanzia Leo ninatoa tamko kwenye baraza hili la madiwani sitaki kusikia suala  la lamba lamba linaendelea ndani ya wilaya kwa yeyote atakayehusika na kuwaleta hao lamba lamba hakutakua na msamaha kwakweli, kama wewe unataka kumuabudu huyo lamba lamba ufanye kimya kimya huko nyumbani kwako sio kuwalazimisha watu wengine tena wa Imani tofauti tofauti" .Aliongeza Dc Kizigo.

Pia amesema kuwa Nchi hii inaongozwa Kwa kufuata katiba na Sheria hivyo hatavumilia viashiria vya uvunjifu wa amani unaosababishwa na lamba lamba ambao wanakiuka maagizo ya serikali kwa  kulazimisha kuingia kwenye nyumba za watu wakidai kuwa wanatoa uchawi kinyume na utaratibu wa Sheria za Nchi.