DC MACHALI AWATAKA WATUMISHI KUFANYA KAZI KWA KUZINGATIA SHERIA ZA KAZI

Imewekwa kwenye: February 9th, 2023

Mkuu wa Wilaya ya Mkalama, Mhe. Moses Machali amewataka Watumishi wa Idara zote na Vitengo na Taasisi zilizopo Mkalama kila mmoja kwa nafasi yake  kufanya kazi kwa weledi, kuacha mzaha, kuheshimu kazi huku wakizingatia  Sheria na Taratibu zilizowekwa katika kufuata  maelekezo halali wanayopewa yasiyo athiri taratibu za kazi.

Ameyasema hayo mapema leo February 9, 2023 katika  kikao kazi kilichojumuisha, Wakuu wa Idara, Vitengo, Taasisi na Watendaji wa Kata katika Ukumbi wa Ofisi za Mkuu wa Wilaya ya Mkalama kikiwa na lengo la kukumbusha majukumu na wajibu wa kila mmoja  kufanya kazi kwa bidii  kwa kuzingatia Taratibu na Sheria za kazi.

‘’Tumekuja hapa kukumbushana ni nini tunachotakiwa kufanya, kupeana muelekeo bila kutoka nje ya Misingi iliyojengwa kwenye Katiba yetu ya Jamhuri ya Muungano wa Tanzania’’ Alisisitiza Mhe. Machali.

Mhe. Machali, ameongeza kuwa kila mmoja kwa nafasi yake ya taaluma anatakiwa kufanya majukumu kwa  weledi na kwa kushirikiana pia kuwa tayari kupokea mabadiliko ya kifkra ya  namna dunia inavyoenda kutokana na kukua kwa Sayansi na Tekinolojia .

Pamoja  na hayo, aliwataka kutumia nafasi zao kutatua changamoto za Wananchi  kwa kwenda Vijijini kubaini Migogoro ya Ardhi  na namna walivyoishughulikia pia kutoa elimu kwa jamii  kushiriki katika shughuli za Maendeleo ili kuunga mkono juhudi zinazofanywa na Serikali.

‘’wakuu wa Idara tokeni ofisini  nendeni kwa Wananchi mkashughulikie  matatizo ya Wananchi, ipende na kuiheshimu nafasi yako uliyonayo na kuitendea haki ‘’ Aliongeza Mhe. Machali.

Sanjari na hayo  Mhe. Machali alimwelekeza Mkurugenzi Mtendaji kushirikiana na Timu yake kuhakikisha wanaongeza ukusanyaji wa mapato na kudhibiti mianya yote ya utoroshaji na ukwepaji wa kulipa kodi  Pamoja na kuwataka wakandarasi wanaopata tenda Wilayani hapa kuhakikisha wanalipa ushuru wa Madini ya Ujenzi.

"Mkurugenzi hakikisha unaweka utaratibu mzuri na timu yako kufuatilia ushuru wa kila chanzo, nimeambiwa hapa mna vyanzo kumi na saba(17) vya mapato kama ni mnadani hakikisheni mnakusanya kikamilifu, kama ni Magetini  hakikisheni mnasimamia vizuri’’ Alisema Mhe. Machali

Naye Mkurugenzi Mtendaji wa Halmashauri ya Wilaya ya Mkalama, Bi. Asia Messos ameahidi kushughulikia maelekezo yote waliyopewa leo na Mkuu wa Wilaya  ili kuendana na dira na kasi yake  na kuhakikisha anawaelekeza Menejimenti yake kushughulikia kero za Wananchi kwa ustawi mpana wa wanamkalama.