DC MACHALI ASISITIZA SUALA LA LISHE SHULENI

Imewekwa kwenye: February 24th, 2023

Mkuu wa Wilaya ya Mkalama, Mhe. Moses Machali amesisitiza suala la Lishe Shuleni ili Wanafunzi waweze kupata chakula  kitakachowasaidia  kupata muda mwingi wa kujisomea pia kudhibiti  Utoro, kujenga afya ya akili kwa mtoto itakayopelekea  matokeo chanya na kuleta mapinduzi katika Sekta ya Elimu Wilayani hapa.

Ameyasema hayo mapema leo wakati akiongea na Wananchi wa Kata za Miganga na Nkalakala katika muendelezo wa ziara  zake  za kusikiliza kero za Wananchi Wilayani Mkalama.

Mhe. Machali  amewataka viongozi wa Serikali za Vijijini  na Kata kushirikiana na Wazazi kuhakikisha wanaweka mikakati mizuri kwa ajili ya kutoa michango kuwezesha suala la Lishe Shuleni  kuhakikisha Afua  hiyo inatekelezwa ili  Wilaya iwe na Watoto wenye akili timamu kwa Maslahi ya Taifa la kesho.

" Nimewaelekeza Viongozi kuhakikisha wanaweka mikakati ya kutoa chakula Shuleni ili Watoto wapate chakula Shule katika kuongeza ufaulu, kila Mtu anajua ukiwa na njaa huwezi fanya chochote unakuwa na hasira" alisisitiza Mhe. Machali.

Aidha, amezitaka Shule kuhakikisha wanamiliki Ardhi ya kutosha kuanzisha Kilimo cha umwagiliaji Ili kuwezesha upatikanaji wa chakula pamoja na kusaidia kujiendesha yenyewe ikiwa ni pamoja na kutekeleza Afua za Lishe Wilayani hapa.

Sambamba na hayo Mhe. Machali ametoa miezi mitatu kwa Shule zote kuwa na matundu ya vyoo yanayoweza kutosheleza idadi ya Wanafunzi huku akiwataka Wananchi kujitolea nguvu kazi katika kufanikisha shughuli hiyo ambayo pia itapelekea Uhifadhi wa Mazingira.