Wilaya ya Mkalama kupunguza kichaa cha Mbwa kutoka 8% mwaka 2019 nakufikia 4% Kwa 2020/2021

Imewekwa kwenye: December 4th, 2021

Katika kupambana na kichaa cha Mbwa  ndani ya wilaya ya Mkalama ,Idara ya Mifugo kwa kushirikiana na Taasisi isiyo ya  kiserikali ya Education for African Animals Walfare (EAAW) inayojishughulisha na haki na ustawi wa Wanyama  Nchi wamefanya chanjo kwa Vijiji vya Ilunda na Matongo  ambapo  kwa vijiji hivyo wamechanja Mbwa wapatao 303.

Zoezi hili limefanyika mwishoni mwa mwezi wa 11 .2021 katika Kijiji cha Ilunda Kata ya Ilunda na  Kijiji cha Matongo Kata ya Matongo wilaya ya Mkalama Mkoani Singida.

Akiongea katika zoezi hilo Afisa  Mifugo wilaya ya  Mkalama Bw.Dotto Michael amesema zoezi hilo ni kutekeleza takwa la kisheria chini ya sheria Na. 17 ya mwaka 2003 ya udhibiti  wa magonjwa ya wanyama na sheria Na.19 ya 2008 ya haki na ustawi wa Wanyama Rafiki .

Aidha ameongeza kuwa zoezi hilo muhimu hufanyika kwa lengo la kupunguza ugonjwa wa kichaa cha Mbwa ili kupunguza hasara kwa wafugaji pindi wanyama  wao wanapopata  kichaa  kuwapoteza na kugharamikia fedha nyingi pindi Mbwa wanapowang’ata watu kutokana na  matibabu yake kuwa ghali.

Katika hatua nyingine Bw.Dotto amewataka wafugaji kujitokeza kwa wingi kupeleka Mbwa wao kupatiwa chanjo pindi wanapopata taarifa ili kutokomeza kabisa kichaa cha Mbwa wilayani Mkalama ambapo kwa mwaka 2021/2022 wanatarajia kufikia 2% ya kupunguza Mlipuko wa kichaa cha Mbwa ukilinganisha na mwaka 2019 ambapo  Mlipuko wa kichaa cha Mbwa ulikuwa ni 8%.

Mkurugenzi wa Taasisi ya EAAW inayojihusisha na ustawi wa Wanyama Bw.Ayubu Nnko amesema kuwa  Shirika hilo limekuwa  likishirikiana na wilaya ya Mkalama tangu mwaka 2019  ambapo kulikuwa na kesi nyingi za Mlipuko wa kichaa cha Mbwa ambapo toka zoezi hilo kuanza kesi hizo zimepungua kutoka 8% mwaka 2019 hadi 4% 2020/2021.

Bw. Nnko amesema kuwa Nchi za Afrika na Tanzania ikiwepo zimekuwa zikitumia Dolla  million ishirini kila mwaka  kutibu watu wanaopata kichaa cha Mbwa ambapo ametumia fursa hiyo kuwataka wafugaji kuzingatia chanjo hiyo ili kuepuka  gharama hizo.