MSITU WA MUNGULI KUTANGAZWA KATIKA GAZETI LA SERIKALI

Imewekwa kwenye: January 6th, 2023

Wakazi wa Kijiji cha Munguli kilichopo Kata ya Mwangeza Wilayani Mkalama wameridhia  kutangazwa kwa hifadhi ya  Msitu  wa Munguli  wenye ukubwa  wa  Hekta 1656, katika Gazeti la Serikali ili kuhakikisha Msitu huo unalindwa na kutunzwa ili uweze kuwapatia manufaa.

Wamefanya maridhiano hayo January 5, 2023 katika mkutano Mkuu wa Kijiji uliofanyika katika Kijiji cha Munguli Kata ya Mwangeza.

 Afisa Maliasili  Mkoa wa Singida Bw. Charles Kidua aliwaeleza wananchi umuhimu wa  kutangazwa kwa Msitu huo katika Gazeti la Serikali  kuwa utawapa manufaa makubwa kwani ngazi za juu  zitautambua Msitu  pamoja na kuwekwa kwa Sheria ndogo  za  Usimamizi Shirikishi wa Msitu na kupelekea  watakao haribu kwa makusudi bila kufuata taratibu kuchukuliwa hatua.

Aidha, Bw. Kidua alitaja  faida za utunzaji wa Msitu kuwa ni kupata fedha kwa kunyonya hewa ya ukaa hivyo kupunguza kero ya kutoa michango ya maendeleo mara kwa mara pindi inapojitokeza.

‘’ katika kupambana na mabadiliko ya  tabia  Nchi  kama ilivyokuwa zamani lazima kila mtu ajue umuhimu wa hifadhi ya mazingira na utunzaji wa msitu ambao hivi karibu utatangazwa katika gazeti la  Serikali  ili Wananchi wa Munguli waweze  kunufaika na Msitu huu kama ilivyo kwa jamii ya Wahadzabe waliopo Yaeda chini Mkoani Manyara’’ aliongeza Bw. Kidua.

 Mwanasheria wa Wilaya ya Mkalama Bw, Daud Makendi aliwataka wananchi kufuata Sheria na taratibu ili kuepuka kuingia katika makosa  ya kisheria ikiwa ni pamoja na kutoa katazo la kuingia na kufanya shughuli zozote za kibinadamu ndani ya msitu bila kupata kibali cha maandishi  kutoka kwa Mamlaka husika.

Aidha, Bw. Makendi aliongeza kuwa mtu yeyote atakayekiuka au kwenda kinyume na kifungu chochote cha sheria ndogo  atakuwa ametenda kosa na akipatikana na hatia atatozwa  faini isiyopungua shilingi elfu Hamsini  na isiyozidi Laki moja  ikiwa ni pamoja na kulipa fidia ya uharibifu  baada ya tathimini kufanyika au kifungo kisichopungua miezi sita na kisichozidi miezi kumi na mbili au vyote faini na kifungo kwa pamoja.

Baadhi ya wananchi waliokuwa kwenye Mkutano huo waliahidi kuulinda na kutunza  hifadhi ya Msitu bila kuvunja Sheria ndogo  na kuridhia kwa pamoja kuwa msitu wao utangazwe kwenye gazeti la serikali .