Jamii imetakiwa kutoa ushirikiano na kufichua vitendo vya Ukatili Kwa Watoto.

Imewekwa kwenye: June 17th, 2022

Jamii imetakiwa kupinga vitendo vya ukatili kwa watoto  na kuripoti vitendo hivyo kwenye vyombo vya sheria  na kutoa  ushahidi  kwa vyombo  hivyo  ili kusaidia  kuchukuliwa  hatua stahiki kwa wanaoendelea kufanya vitendo hivyo.

Kauli  hiyo imetolewa juni 16 na Remigius Ngole  Afisa  Tarafa,  Tarafa ya Nduguti alipomwakilisha  Mkuu wa Wilaya  ya Mkalama  katika kilele cha siku ya mtoto wa Afrika  kilichofanyika katika kijiji cha Iambi Kata ya Ilunda  Wilayani hapa.

‘’Bado vitendo vya ukatili kwa watoto  vinatishia  ustawi kwa watoto  wetu, vitendo vya kupigwa , kubakwa , kulawitiwa pamoja na mimba  kwa wanafunzi havikubaliki katika jamii, hivyo naagiza vyombo vya dola kuchukua  hatua stahiki  kwa wote  wanaofanya vitendo hivi kwa watoto, hivyo ninatoa  rai kwa wananchi kufichua vitendo hivi’’. Aliongeza Ngole.

Ngole aliongeza kuwa migogoro ya ndoa imekua ni chanzo cha watoto kufanyiwa ukatili na kuzalisha tatizo la ongezeko la watoto wa mitaani  kwani wanakosa  haki za msingi kwakukosa malezi mazuri ya wazazi  pamoja na kukosa haki ya kupata elimu hivyo kuwataka wazazi kuepuka migogoro hiyo kwa ustawi wa watoto kwani ni taifa la kesho.

Aidha aliongeza kuwa serikali ya awamu ya Sita imekua ikifanya jitihada za kuhakikisha watoto wanakua kwenye mazingira mazuri  na kupata elimu  bora na kwakujali hilo imetenga fedha  shilling 96,200,000 kwaajili ya ujenzi wa bweni la wasichana shule ya sekondari  Malaja  ili  kupunguza vishawishi kwa watoto wa kike na kutimiza malengo yao .

Awali akimkaribisha Mgeni  rasmi Afisa  Maendeleo Wilaya ya Mkalama Mohamed  Atiki alisema siku ya mtoto wa Afrika huazimishwa kila ifikapo june 16 kila mwaka  na Nchi 51 wanachama wa Umoja  wa Nchi huru za Afrika(O.A.U).

Atiki aliongeza kuwa lengo la maadhimisho haya ni kukumbuka  mauaji ya kinyama waliofanyiwa watoto wa  Kitongoji cha Soweto Nchini Afrika Kusini  mwaka 1976 hukuTanzania nayo ikiwa kama mwanachama  wa Umoja  wa Nchi huru  za Afrika  ilianza kuadhimisha siku ya mtoto wa Afrika mwaka 1991.

Wakisoma risala kwa mgeni Rasmi watoto wa  kijiji cha Iambi  walianza kwakuishukuru serikali ya awamu ya Sita kuendelea kutoa elimu bila malipo kuanzia Chekechea hadi kidato cha Nne  na kuongeza kuwa kwa kipindi cha mwaka Mmoja wameshuhudia  juhudi za serikali  katika ujenzi wa madarasa kwa kutumia  fedha za UVIKO 19  jumla ya madarsa 63 yamejengwa  ikiwa kwa shule za  Msingi ni madarasa 16 na  Shule za Sekondari  47 yaliyogharimu shilingi  940,000,000.

Aidha walisema kuwa pamoja na pongezi hizo wamekua wakikabiliwa na changamoto mbalimbali ikiwa ni pamoja na kuwepo kwa matukio ya kufanyiwa ukatili huku  wakiomba jeshi la polisi kukamilisha kesi  10 zilizopo kwenye upelelezi pamoja  nakuiomba serikali kuhamasisha wazazi kuchangia chakula shuleni  kwani inapelekea mahudhurio yao  kuwa mabovu pamoja na ufaulu kuwa duni.

Maadhimisho haya huambatana na kauli mbiu mbalimbali ambapo kwa mwaka huu inasema “TUIMARISHE ULINZI WA WATOTO ,TOKOMEZA UKATILI DHIDI YAKE JIANDAE KUHESABIWA’’