“HONGERENI KWA KAZI NZURI” DED ASIA MESSOS

Imewekwa kwenye: May 29th, 2024

Mkurugenzi Mtendaji wa Halmashauri ya Wilaya ya Mkalama Bi. Asia Messos amewapongeza Wauguzi wa Afya Wilayani Mkalama kwa kufanya kazi kwa bidii kwa maendeleo ya sekta ya Afya wilayani Mkalama na kwa taifa kwa ujumla

Pongezi hizo amezitoa Mei 29,2024 wakati wa sherehe ya maadhimisho ya siku ya Wauguzi duniani kiwilaya iliyofanyika katika ukumbi wa Sheketela uliopo Halmashauri ya wilaya ya Mkalama.

“Sijawahi kusikia hata siku moja kituo cha Afya kimefungwa kwa kukosa Wauguzi,hii ni kwasababu kazi kubwa inafanyika huko chini. Hatujawahi kukosa huduma Afya Mkalama, nawapongeza sana kwa hili” DED Asia Messos

Aidha Mkurugenzi Mtendaji Bi.Asia Messos amewataka Wauguzi hao kuendelea kufanya kazi kwa uaminifu na uadilifu kama kiapo cha kazi kinavyosema

“Muendelee kufanya kazi kwa uamifu kama kiapo chenu kinavyosema, Tuchape kazi, hakuna aliyefanikiwa kwa kuwa chawa, kila aliyefanikiwa amefanya kazi, Nchi yetu haiwezi kujengwa na mtu yeyote isipokuwa sisi” Bi. Asia Messos

Kwa upande wake Mganga Mkuu wilaya ya Mkalama, Dkt. Solomon Michael amewapongeza kwa kuadhimisha siku hii muhimu kwao huku akiwataka kuendelea kuishi katika kiapo cha kazi kwa kufanya kazi kwa bidi na kwa uaminifu.