DC MACHALI AAMURU KUWEKWA NDANI MTENDAJI NA MKUSANYA MAPATO KIJIJI CHA IGUGUNO

Imewekwa kwenye: August 18th, 2023

DC MACHALI AAMURU KUWEKWA NDANI MTENDAJI NA MKUSANYA MAPATO WA KIJIJI CHA IGUGUNO

Mkuu wa wilaya ya Mkalama Mhe Moses Machali Leo Agosti 18 ameamuru kuwekwa ndani Mtendaji wa kijiji Cha Iguguno Kiraka Monge, Kata ya Iguguno  pamoja na Mkusanya mapato wa kijiji  hicho Manase  Kizula   kwakosa la kukusanya ushuru kwa Wananchi bila kuwapa risti.

Mhe. Machali ametoa maagizo hayo wakati wa mkutano wa hadhara uliofanyika leo  Agosti 18, 2023 kwenye Kata ya Iguguno ambapo alitumia fursa hiyo  kusikiliza na kutatua kero za Wananchi wa kata hiyo.  

"Mhe. Mkuu wa Wilaya  sisi wajasiriamali wadogo wadogo tunaojulikana kama wachuja nafaka tumekuwa tukilipa ushuru wa bidhaa zetu tangu Mwaka 2019  lakini hatujawahi kupewa  Stakabadhi ya Malipo ( Risti)" Alisema mmoja wa wafanyabiashara hao

Kutokana na Sakata hilo Mkuu wa Wilaya alimuagiza Afisa Utumishi Wilaya ya Mkalama kushughulikia watendaji wote wanaokiuka maadili ya Utumishi wa umma ambapo amesisitiza atahakikisha anapambana na wabadhilifu wote ili kila mtumishi aweze kutenda haki kwa Wananchi.

Pamoja na hayo Mhe. Machali  alimtaka Kaimu Mtendaji wa Kata ya Iguguno Paul Grindai  kuhakikisha anaanzisha mchakato wa kupata baraza la ardhi la kata baada ya lile lililokuwepo awali kuvunjwa kutokana na  kushindwa kutekeleza majukumu yake ipasavyo.

" Toa tangazo kwenye mbao za Matangazo Ili Wananchi wenye sifa za kuwa wajumbe wa Baraza la Ardhi la Kata  kugombea nafasi hizo Ili kuhakikisha migogoro ya Ardhi inaanza kutatuliwa ngazi ya Kata kabla ya kwenda ngazi ya Wilaya" Alihitimisha Mhe. Machali.

Ziara ya Mhe. Machali kwenye Kata ya Iguguno  ni mwendelezo wa ziara zake za kusikiliza na kutatua kero za wananchi Wilayani Mkalama.